حوار زجلي بين ابو شادي و جعفر

ابو شادي يقول:

يا شمس طلّي من سماكِ تْأمّلي --- وشوفي أبو شادي العقيد الأوّلي

بإسمي عناوين الثقافة معنونِة --- والكتب لولايي سعرها ما غلي

ولولا كلامي الكرم عنبو ما حِلي-- ولولا حبوبي الأرض ظلّت ماحلِة

ولو كان ببلادي المنابر أمحلوا --- بعمل" أنا والدف" جوقة كاملة

الردمن جعفر

ضبو لدفك بعدهن ما أمحلو
باسمي المنابر عالنجوم بيعتلو

خلي الشموس على الحقيقة يهطلو
بلكي حروف الحق متلي بينجلو

كرومك إذا من هيك حكي بينتلو
لا بينبتو ولا بيطلعو ولا بيقبلو

بدنا ثقافة مأصلة حتى العرب
من تحت صفر على الصفر تا يوصلو

الرد من ابو شادي

يابو إسم صاروا حروفو ذايبين
بدّك شموس العدل يبقوا ساطعين؟؟؟

وبدّك ثقافة عمرها ألوف السنين
تحت الصفر ظلّوا العرب متجمدين!!!

صار لي ربع قرن بمروج الماحلين
بزرع محلّ الشوك فُلّ وياسمين

ت صُرِتْ مثل النابغة بمنبر عُكاظ
عامل على الشّعّار شيخ مْحكَّمين

الرد من جعفر

بدوّب حروفي شموع ع دروب الدني
حتّى اللّي متلك بالمحبّة يغتني

يا ( نابغة ) طوّر بشعرك واعتني
حاجي عكاظ ونابغات وعنعنة

للياسمين اللي عا اسمي منحني
بزرع ايديي شموس .. للفلّ الهني

ولما الشمس بتتوه عن درب عالبشر
أسمي أنا بيدلـّـها عالكاينة

الرد من ابو شادي

يابو إسِم بهدي الشمس عالمسكبي

هيدا حكي ما بيقبلو جاهل صبي

إرجع يابن حيدر لكتب المكتبِه

وِتْأمّل بعين العقل والموهبي

كيف الأسامي في شريعة مذهبي

بتحمل معاني خالدة ومذهّبي

مع إسم جعفر ما وصِلِت حيدر-علي

وإسمي محمّد - والصلاة على النبي

الرد من جعفر

لا تحتمي باسمك الطاهر عيفنا
اسمك على روس المحبة ريفنا

يا ما أسـامي كشـفتلنا زيفنا
ويا ما أسامي كشّفت تصييفنا

ولو سألتني بعد الأسامي كيفنا
بدنا فعل ... وإن ما إجا .. يا حيفنا

الأفعال هيي العمرت دار العرب
بس الأسـامي أكلتلنا رغيفنا

الرد من ابو شادي

إسمي محمد...نور عالكون انجلى

الله اختارو نبي تايهدي الملا

وروّض طْباع الناس ووحوش الفلا

وروح التعصّب من صدر شعبو جلى

خير الأسامي إسم الله في العُلا

خالق طبيعة كلّها زينة وحلا

وفي ناس خِلقت للعداوة والأذى

وفي ناس خِلقت للعبادة والصّلا

والى اللقاء في الجزء الثاني